Eftir frekar þunglamalega byrjun hjá okkar mönnum gegn Leikni vonumst við til að okkar menn verði örlítið frískari gegn Víkingum á föstudaginn. Menn skulu þó ekki vera allt of bjartsýnir, því auðvitað eru þessi leikir notaðir til þess að kanna ýmsar uppstillingar á liðinu. En það á samt ekki að vera nein afsökun fyrir því að tapa.

Berserkir eru stuðningsmenn Víkinga. Þeir starfrækja heimasíðu sem með ágætum. Stuðningsmenn Víkinga mættu samt vera svolítið fágaðri á spjallsíðunni. Þar sleppa menn sér greinilega algjörlega. Víkingur.is er svo aðalmálgagn Víkinga en sú síða er til mikillar fyrirmyndar.

Víkingur
Því miður náðist ekki í ritstjóra Berserkjasíðunnar svo við verðum að láta almennar vangaveltur duga að þessu sinni. Sigurður Jónsson er þjálfari Víkinga. Hann hefur verið þekktur fyrir allt annað en að gefast upp þegar út á knattspyrnuvöllinn er komið. Víkingar voru að spila mikinn varnarbolta síðasta sumar og í báðum leikjum sínum við FH náðu þeir fram jafntefli. En þeir byrjuðu mótið mjög illa og voru allt sumarið að vinna það upp. Þeir áttu gríðarlega erfitt með að skora en í þeim leikjum sem þeir hafa spilað á Reykjavíkurmótinu til þessa hefur það ekki verið sérstakt vandamál. Það er alveg ljóst að það er fullt af efnilegum knattspyrnumönnum í þessu liði. Það er því alls ekki hægt að bóka neitt á móti piltunum úr Fossvoginum.

FH
Það er mjög erfitt að spá um það hvernig byrjunarlið FH verður í leiknum á föstudaginn. Ef við skjótum á eitthvað þá er allt eins gott að taka fyrir byrjunarliðið eins og það var gegn Leikni. Ætla samt að leyfa mér að spá Jónsa inn í liðið ef hann er í leikformi.

Valþór
Gummi - Sverrir - Freyr - Heimir
Gamli - Ólafur Páll
Grani
Jónsi - Ármann Smári - Atli Viðar

Spá
Við sigrum þetta 1-0. Við sýndum að vörnin var traust á móti Leiknismönnum. Það eina sem vantaði upp á var að miðjan gerði eitthvað að viti. Það verður búið að laga það gegn Víkingum. Ármann Smári skorar.

Íslandsmeistarar 2004