5. flokkur 1986. Auðun Helgason fyrir miðju í neðri röð.

Mynd: Íslensk knattspyrna 1986

Þú varst í hópnum (5. flokki) sem varð fyrstur Íslandsmeistari í knattspyrnu hjá FH 1986. Ertu í sambandi við einhverja úr þeim hópi?
Já nokkra.  Lúlli Arnas sem er í rekstrarstjórninni var framherji og svo er ég í sambandi við Óla Björn og Níels sem spiluðu í meistaraflokki FH fyrir nokkrum árum.  Einnig er Gunnlaugur Árnason (Gulli) mikill vinur minn en hann skoraði seinna markið í úrslitaleiknum!  Við unnum 2-0 að mig minnir!

Gastu fylgst með FH síðastliðið sumar?
Mjög lítið.  Reyndar las ég mikið á mbl.is og horfði stundum á mörk umferðarinnar á visi.is (Olíssport).

Sástu einhverja leiki?
Því miður sá ég engan leik í sumar.

Hvað fannst þér um sumarið?
Það sem ég heyrði og las var mjög jákvætt.  FH átti þetta svo sannarlega skilið.

Þú nefndir á blaðamannafundinum að þú værir öðru vísi leikmaður en þegar þú yfirgafst FH - hvernig?
Fyrst og fremst reynsla og yfirvegun.  Ég er miklu meiri stjórnandi núna og tek meiri ábyrgð á leikvelli og í raun fyrir utan völlinn líka.  Ég myndi segja að ég væri miklu jafnari (stabílari) leikmaður í dag en þegar ég fór frá FH 1995.

Hverjar eru sterku hliðar þínar?
Ég er fjölhæfur. Sterkur maður á móti manni, góður í loftinu, góðar langar spyrnur og góður leikskilningur.

Veikleikar?
Stundum vantar meira skap í mig á leikvelli.  Konan mín segir að ég eigi að vera "klikkaðari" í vissum tilvikum! Þá á hún við á leikvellinum.

Hvort líturðu frekar á þig sem miðvörð eða bakvörð?
Miðvörð

Hvort finnst þér skemmtilegra að spila?
Miðvörð.  Þar nýtast mínir hæfileikar mest, þ.e. að stjórna, að tala og að vinna návígi.

Áttu von á að geta gengið beint inn í byrjunarliðið hjá FH? 
Ég ætla mér að vinna fast sæti í líðinu.  Ég er staðráðinn í því að sýna FH-ingum hvað í mér býr.

Viltu gefa upp hvaða önnur íslensk lið höfðu áhuga á að fá þig í sínar raðir?
Nei, enda hefur það enga þýðingu í dag.  Það einbeiti mér bara að FH í dag og í nánustu framtíð.