Mynd: Jóhannes Long

1) Af hverju FH?
Hefði þurft að taka þrjá strætóa í næsta stórveldi.
2) Segðu okkur frá fyrstu ferðinni á FH-leik sem þú manst eftir.
Man eftir heimaleik við Val á æfingagrasinu ’89. Töpuðum honum reyndar. Atli Eðvalds setti markið, man ég.
3) Segðu okkur frá eftirminnilegum leik.
Ýmsir KR-sigrar eftirminnilegir. Fjórir síðustu leikir okkar við það lið eru í fersku minni. Einnig útisigur fyrir mörgum árum er Atli Einars skoraði sigurmarkið. Einnig eftirminnilegur leikur 6. flokks FH gegn Fylki á Tröllatópasmótinu 1990. Sigurmarkið gerðu Fylkismenn þegar markvörður okkar, Úlfar Linnet, festist í netmöskvunum, lá kylliflatur og kom engum vörnum við.
4) Hver er uppáhaldsleikmaður þinn og hvers vegna? (Núna/í gegnum tíðina)
Borgvardt er skuggalega góður. Bjössi Jóns var líka fantagóður varnarmaður og ávallt verið minn eftirlætisbókasafnsvörður. Að Borgvardt ólöstuðum myndi ég samt krýna Hörð meistara Magnússon besta leikmann Krikans þar sem félaginn setti ótrúlega mörg í þeirri efstu. Ógjörningur að telja þá leiki sem maðurinn vann fyrir Fimleikafélagið. Fer ekki að líða að því að þriðji hluti sögu hans komi á vefinn?
5) Hvert er eftirminnilegasta markið sem skorað hefur verið í Krikanum?
Mark Davíðs Garðarsonar gegn KR ’93 var eftirminnilegt, einkum fyrir þær sakir að hann nefbrotnaði í fagnaðarlátunum. Stangamark Harðar Magg gegn KR um árið var samt það stórbrotnasta sem ég hef séð. Menn hrósuðu óspart fádæma góðri staðsetningu Hödda er hann tók strauið yfir á hægri kant og setti hann. Sjálfur sagðist kappinn reyndar hafa hlaupið í átt að stúkunni til að fagna marki er hann sá knöttinn skjótast í átt að sér… Reyndar gæti Guðlaugur Baldursson einnig gert tilkall til eftirminnilegasta marksins í Krikanum en hann skoraði jú úr misheppnaðri stungusendingu um árið. Það var hræðileg sending.
6) Hver hefur verið besta stundin sem FH aðdáandi? En sú versta?
Undanúrslit í bikar gegn Víði í Garði ’91 er Höddi setti þrjú. KR leikurinn á Laugardalsvelli í fyrra kemur að sjálfsögðu einnig upp í hugann. Verst var vafalaust að upplifa tapið gegn Fylki 18. september 1989. Í fyrsta sinn sem ég sá fullorðna menn gráta.
7) Hvaða leikmann viltu sjá í FH treyju? Og hvern viltu alls ekki sjá í FH treyju? Gaman væri að sjá kappa eins og Davíð Viðars, Hannes og Bjarna Þór taka hörkutímabil í Krikanum. Annars vil ég sjá sem flesta í FH-treyjum. Ef þeir geta ekkert gæti samt verið betra að hafa þá bara uppi í stúku.
8) Hverjir eru verstu andstæðingar FH að þínu mati?
Höfum alltaf átt erfitt með Villareal. Annars eigum við enga “verstu” andstæðinga. Bara spurning um hugarfar hverju sinni.
9) Hverju myndir þú breyta hjá FH?
Okkur vantar fleiri stuðningsmannalög.
10) Hvernig myndir þú stilla upp liði ef þú gætir valið úr öllum leikmönnum FH fyrr og síðar?

Stefán Arnarson
Auðun Helga Mrazek Tommy Viddi Hall*
Óli K Heimir Guðjóns Addi Vidd Andri Marteins
Höddi Magg Allan Borgvardt

Tréverkið: Daði Lár, Bjössi Jóns, Pálmi Jóns, Jónsi, Hallsteinn
Þjálfari: Óli Jó
Sjúkraþjálfari: Þórður Magnússon
*Hef einu sinni séð Vidda Hall spila og það í old boys leik en gaurinn virkaði ansi þéttur.
11) Hvaða liði heldur þú með úti í hinum stóra heimi?
Er gallharður Newcastle maður.
12) Hvar sérðu FH fyrir þér eftir 10 ár?
Að fagna 85 ára afmælinu. Jafnvel með pompi og prakt. Eftir 10 ár gæti samt verið við hæfi að virða fyrir sér Íslandsmeistarabikarinn 2004.