Mynd: Jóhannes Long

Einhverjar meiningar voru um það í upphafi tímabils að Fimleikafélagið væri ekki tilbúið, myndi hrapa, myndi skipta um deild við litla bróður. Nei, nei, nei, FH-liðið hefur svo sannarlega verið tilbúið í sumar. 2. sætið í deildinni tryggt og úrslitaleikur í bikarkeppni handan við hornið. Frábært tímabil að enda en við viljum rúsínu ef rúsínu skyldi kalla.

Síðustu leikir við andstæðinginn
Þegar leikir sumarsins á móti ÍA eru skoðaðir þá enduðu þeir báðir með jafntefli. 1-1 í Kaplakrika þar sem við vorum óheppnir að innbyrða ekki sigur og 0-0 uppi á Skaga þar sem mér skilst (var í útlandinu) að Skaginn hefði frekar átt vinna ef annað liðið hefði átt að vinna. Bæði liðin hafa verið á mjög góðu róli í deildinni undanfarnar vikur og enduðu með jafnmörg stig. Þannig að miðað við þetta ætti mjög jafn og spennandi leikur að vera framundan.

Styrkur þeirra gulu
Það verður ekki tekið af Skagmönnum að þeir hafa hefðina með sér enda eitt sigursælasta lið í íslenskri knattspyrnu. Barátta og samheldni hefur verið þeirra aðall í sumar og verður sennilega alltaf hjá þeim liðum sem Ólafur Þórðarson stjórnar. Skagamenn eru mjög sterkir í öllum föstum leikatriðum með Gunnlaug og Julian fremstan í flokki. Þeir eru stilla upp framherjum sem eru ólíkir og virðast mynda gott sóknarpar. Stefán Þórðarson, gríðarlega baráttuglaður og vinnusamur með góðan vinstri fót og Garðari sem er mjög snarpur og teknískur strákur. Kári Steinn virðist vera taugalaus og nýtur sín best í leikjum sem þessum.

„Strákarnir okkar”
Strákarnir hafa gefið öllum svartsýnisröddum langt nef, sýnt mikinn og góðan karakter og spilað bráðskemmtilegan fótbolta í allt sumar. Ég er nú ekki vanur að missa mig í einhverju bjartsýnismóki fyrir knattspyrnuleiki okkar manna og ætla ekki að gera það núna heldur. En ég leyfi mér að spá okkar mönnum naumum sigri í leiknum.

Af hverju? Liðið er með mikið sjálfstraust, góða liðsheild, leikmenn sem geta unnið leiki upp á eigin spýtur og klóka og reynslumikla þjálfara.

Hver og einn
Daði er kominn með mikla og góða reynslu og er ekki einungis fallegsti markvörður deildarinnar (skv.femin.is) heldur líka sá besti. Tommy og Sverrir mynda eitt besta miðvarðapar deildarinnar, Maggi hefur bætt sig mikið sem knattspyrnumaður í sumar, Freyr er í góðu sambandi. Heimir er sannkallaður kóngur á miðjunni, Baldur er orðinn eins og hann á að sér að vera, Grani skorar þegar hann vill, Allan er besti leikmaður deildarinnar og Hemmi kemur með baráttu og kraft sveitamannsins. Þessir 11 mynda liðið sem sigraði KR í undanúrslitunum og eru kannski ekki ólíklegt byrjunarlið. En við eigum fleiri ása upp í erminni eins og Guðmund hinn þriðja sem alltaf reynist vel, Emma tækniundur sem teiknar örugglega einhverja knetti á sóknarmenn okkar, Atla sem langar meira en alla að skora á laugardaginn og Víði gullfót sem vil ólmur sanna sig á meðal þeirra bestu.

Hvað get ég gert?
Farið á völlinn og öskrað mig hásan okkar mönnum til stuðnings. FH-ingar mætum allir sem einn og hjálpum okkar mönnum að innbyrða þann stóra.

Áfram FH

Guðlaugur Baldursson