1) Af hverju FH?
Ég er Hafnfirðingur? Er eitthvað annað félag í Hafnarfirði? Nei annars án gríns. Ég er fæddur í FH fjölskyldu. Faðir minn og móðir héldu með FH og öll systkini halda með FH. Sísí ein eldri systir mín var fyrsta kona á Íslandi til þess að taka við Íslandsmeistarabikar en hún varð Íslandsmeistari með vinkonum sínum í FH. Þær voru brautryðjendur á sínu sviði og unnu meðal annars Stjörnuna úr Garðabæ 19-0 eitt árið og settu vallarmet á Kaplakrika sem að stóð í mörg ár og stendur kannski enn? Held þó að það hafi verið slegið fyrir nokkrum árum? Einnig voru fyrstu vinir mínir synir Ingvars Viktorssonar (og eru enn) þannig að allt þetta hjálpaðist að til þess að gera mig FH-ing og ég er feginn því!

2) Segðu okkur frá fyrstu ferðinni á FH-leik sem þú manst eftir.
Ég man eftir því þegar ég var lítill þá fór ég á handboltaleik með pabba og hann setti mig uppá einn ofninn fyrir ofan áhorfendapallana í íþróttahúsinu í Hafnarfirði. Ég sá Pálma Sveinbjörnss, Ómar í markinu, Óla Dan, Ásgeir Arinbjarnar, Onna, Vidda H, Þóri, Janus og fleiri í fótboltanum. Annars man ég ekki eftir fyrsta knattspyrnuleiknum sem ég fór á en ég man eftir því þegar ég var að vinna við grasvöllinn '76 og svo man ég eftir því að Egill bróðir minn og Heddi vinur hans hjálpuðust við að skora fyrsta markið á grasvellinum á Kaplakrika en þeir voru þá í unglingavinnunni!

3) Segðu okkur frá eftirminnilegum leik.
Eftirminnilegur leikur var leikur gegn Víkingum í Kaplakrika þar sem að FH var undir 3-0 (minnir mig) þegar að korter var eftir af leik en jöfnuðu á tíu mínútum og skoruðu svo sigurmarkið rétt áður en flautað var af og unnu 4-3, alger snilld eins og einhverjir myndu segja í dag. Eins var eftirminnilegur leikur í handboltanum þegar að Geir Hallsteinsson þurfti að skora 13 mörk í síðasta leiknum til þess að verða markhæstur í deildinni og hann gerði það eins og að drekka vatn. Kannski er minnið að bregðast mér en þetta var eitthvað í áttina allavega.

4) Hver er uppáhaldsleikmaður þinn og hvers vegna?
Hörður Magnússon vegna allra markanna sem hann hefur skorað. Í sambandi við núverand leikmenn á ég erfitt með að segja, mér finnst þeir allir hafa staðið sig vel. allt liðið, Óli Jó og Leibbi Rooney líka. Get ekki annað en minnst á Geir Hallsteinsson úr handboltanum, einn mesti snillingur sem að ég hef séð snerta handbolta. Og góður kennari líka.

5) Hvert er eftirminnilegasta markið sem skorað hefur verið í Krikanum?
Engin spurning, eftirminnilegasta markið sem skorað hefur verið í Krikanum er mark sem að Hörður Magnússon skoraði á móti KR, man ekki árið. Markið var þannig tilkomið að Hörður lék upp hálfan sinn eigin vallarhelming og allan hinn helminginn upp að vítateig andstæðinganna (sem vísar í austur að gamla vellinum) átti skot í vinstri stöngina þaðan fór boltinn eftir línu andstæðinganna í hægri stöngina og út og .......... viti menn sjálfur Höddi Magg. var mættur þar og skoraði að sjálfsögðu!! Hvað annað? Reyndar held ég að þetta sé með þeim allra glæsilegustu mörkum sem ég hef séð og þá eru mörk Wayne Rooney meðtalin og reyndar öll mörk sem ég hef séð skoruð í enska boltanum. Því má ekki gleyma að hann hitti NOKKRA leikmenn KR á leiðinni að þessu glæsilegasta marki sem skorað hefur verið á Kaplakrika!

6) Hver hefur verið besta stundin sem FH aðdáandi? En sú versta?
Besta stundin?, Dundee United v. FH? FH v. Cemertarnica? Ég veit ekki? Annars er ég nokkuð viss um að þetta verður endurskoðað verulega á næstunni eða í lok mánaðarins, hef það bara á tilfinningunni. Sú versta var án efa sorgarstundin þegar að KA mönnum tókst að ræna Íslandsbikarnum úr höndum okkar eftir að við höfðum tapað hér heima fyrir Fylksmönnum sem að féllu samt. Mér leið ekki vel þann daginn og augun voru ekki alveg þurr. Næst versta stundin held ég var þegar að tilkynnt var í hátalarakerfi vallarins á Kaplakrika að FH væri komið upp (algerlega óstaðfest) og helmingur stuðningsmanna (á móti stúkunni) hlupu alla leið yfir völlinn í mikilli geðshræringu til þess að fagna en þegar þeir voru komnir yfir þá kom önnur tilkynning um það að FH væri ekki komið upp.... Mikil leiðindi ég verð að segja það og eflaust hafa leiðindin ekki verð síðri í stúkunni?

7) Hvaða leikmann viltu sjá í FH treyju? Og hvern viltu alls ekki sjá í FH treyju?
Ég myndi vilja sjá annað hvort Wayne Rooney eða Gunnlaug Jónsson, ÍA spila í FH-treyjunni. Ég myndi hvorki vilja sjá Þórð Guðjónsson í FH né Lee Bowyer.

8) Hverjir eru verstu andstæðingar FH að þínu mati?
Mér dettur enginn andstæðingur í hug. Eru þeir ekki allir eins?

9) Hverju myndir þú breyta hjá FH?
Æi þessi er erfið. Ég myndi vilja að áhorfendur hittist á einum stað fyrir mikilvæga leiki í stað þess að hittast á fjórum stöðum. Ég myndi vilja hafa betri skipulagningu á þessu. Annars er FH stjórnað ágætlega hef ekki mikið út á það að setja en samt "pínu"

10) Hvernig myndir þú stilla upp liði ef þú gætir valið úr öllum leikmönnum FH fyrr og síðar?
Það er auðvelt.....

Stefán/Daði
Auðunn Helga - Sverrir Garðars - Tommy Nielsen - Óli Kristjáns
Viddi Halldórs - Janus Guðlaugs - Heimir Guðjóns - Arnar Viðars
Höddi Magg - Allan Borgvardt

11) Hvaða liði heldur þú með úti í hinum stóra heimi?
EVERTON, Englandi. (Það er sko til eitt Everton í Chile....)

12) Hvar sérðu FH fyrir þér eftir 10 ár?
Vonandi með að minnsta kosti þrjá Íslandsmeistaratitla, nokkra bikartitla og yfirbyggðan knattspyrnuvöll!

13) Hvernig fer næsti leikur?
0-1 fyrir FH gegn Þrótti á Laugardalsvellinum (FH sigraði 0:3)